1. ᐱᕙᓪᓕᖁᑎᐅᓗᓂ ᓄᓇᓕᒻᒧᑦ
- ᐱᓇᓱᐊᕐᑕᖅ ᐊᑐᕐᓂᖃᕐᓗᓂ ᐱᕙᓪᓕᖁᑎᐅᓚᖓᔪᖅ ᐃᓄᑐᐃᓐᓇᓕᒫᓄᑦ ᓄᓇᓕᒻᒥᐅᓄᑦ.
- ᐱᓇᓱᐊᕐᑕᖅ ᑕᑯᑦᓴᐅᑎᑦᓯᓚᖓᔪᖅ ᓄᓇᓕᒻᒥ ᐃᓗᓯᓕᕆᓂᕐᒥ ᖃᓄᐃᖕᖏᓯᐊᕐᓂᒧᓪᓗ ᐱᓇᓱᐊᕐᑕᐅᓴᐅᑎᒋᒋᐊᓕᓐᓂᒃ.
- ᑯᐯᒻᒥ ᖃᓪᓗᓈᑦ ᓄᓇᖓᓂᒥᐅᑦ ᐃᓄᑐᐃᓐᓀᑦ ᖃᐅᔨᒪᑎᑕᐅᓂᐊᕐᑐᑦ ᐱᓇᓱᐊᕐᑕᒧᑦ ᑐᕌᒐᕐᓂᒃ, ᐱᓇᓱᑦᑕᐅᒍᓯᖏᓐᓂᒃ ᓄᐃᑕᖏᓐᓂᓗ.
2. ᐃᓚᐅᑎᑦᓯᓗᓂ ᐃᓄᐃᑦ ᓄᓇᕐᔪᐊᒥ ᑕᑯᓐᓇᕈᓯᖓᓂᒃ
- ᐃᓄᐃᑦ ᖃᐅᔨᒪᐅᓯᖏᑦ ᐃᓕᑕᕆᔭᐅᓯᒪᓗᑎᒃ ᓲᓱᒋᔭᐅᑦᓯᐊᓗᑎᓗ
- ᖃᐅᔨᓴᕐᑌᑦ ᐱᓇᓱᑦᑕᐅᓂᖏᑦ ᐊᑐᕐᓂᐊᑐᑦ ᐃᓄᐃᑦ ᖃᐅᔨᒪᐅᓯᖏᑦᑕ ᐊᑐᕐᑕᐅᒍᓯᖏᓐᓂᒃ ᐱᓇᓱᑦᑕᐅᒍᓯᖏᓐᓂᓗ
- ᐱᓇᓱᐊᕐᑕᖅ ᑐᖕᖓᕕᓕᒃ ᐃᓚᐅᔪᓕᒫᑦ ᑐᑭᓯᒪᑦᓯᐊᑎᑕᐅᓂᖏᓐᓂᒃ ᑐᑭᑖᑦᓯᐊᕈᓐᓇᓂᐊᕐᒪᑕ ᖃᐅᔨᓴᕈᑎᓂᒃ ᖃᓄᓪᓗᐊᑎᒋᓗ ᐃᓚᐅᕕᖃᕐᓂᐊᒪᖔᕐᒥ.
3. ᓲᓱᒋᔭᖃᑦᓯᐊᓗᓂ ᐃᓄᑐᐃᓐᓇᓂᒃ ᓄᓇᓕᓐᓂᓗ
- ᖃᐅᔨᓴᕐᑐᖃᕐᓂᓕᒫᖓᓂ ᓇᐅᑐᐃᓐᓇᓄᑦ ᖃᐅᔨᒪᔭᐅᑎᑦᓯᒋᐊᖃᖕᖏᓂᖏᓐᓄᑦ ᐱᔪᓐᓇᐅᑎᖓ ᐊᑐᑦᓯᐊᑕᐅᖏᓐᓇᓂᐊᕐᑐᖅ.
- ᐱᓇᓱᐊᕐᑕᖅ ᐃᓱᒪᒋᔭᖃᕐᓯᒪᔪᖅ ᓇᔪᕐᑕᖏᓐᓂᒃ, ᐃᓅᖃᑎᒌᓐᓂᖏᓐᓂᒃ ᑮᓇᐅᔭᓕᐅᕋᓱᐊᕐᓂᑯᓪᓗ ᖃᓄᐃᑦᑐᓴᔭᐅᒻᒪᖔᑕ ᖃᐅᔨᓴᕐᓂᒧᑦ ᐃᓚᐅᔪᑦ, ᐊᒻᒪᓗ ᖃᐅᔨᓴᕐᓂᐅᑉ ᓱᕐᕃᓂᕆᒍᓐᓇᑕᖓᓂᒃ ᓄᓇᓕᒻᒥᒃ.
- ᖃᐅᔨᓴᕐᓂᒧᑦ ᐃᓚᐅᔪᑦ ᐱᓇᓱᖃᑎᒌᑦᑐᓄᓪᓗ ᐃᓚᐅᔪᑦ ᓲᓱᒋᔭᐅᑦᓯᐊᕆᐊᖃᕐᓂᖏᑦ ᐊᑐᕐᑕᐅᓯᐊᕐᓗᑎᒃ ᐃᓱᒪᖃᕇᕐᕕᐅᒍᓐᓀᓗᑎᓗ.
4. ᐃᑉᐱᒋᔭᖃᑦᓯᐊᓗᓂ ᐱᑕᖃᕆᐊᖓ ᐊᑦᔨᒌᖕᖏᑐᓂᒃ ᖃᐅᔨᒪᐅᓯᕐᓂᒃ ᐱᓂᐊᕐᓂᖃᕈᓯᕐᓂᓗ
- ᓄᐃᑦᓯᖃᑎᒌᓐᓂᖅ ᖃᐅᔨᒪᔭᐅᓚᖓᔪᓂᒃ ᓄᑖᓃᒃ ᐱᓇᓱᐊᕐᑕᐅᑉ ᑐᕌᒐᖏᓐᓄᑦ ᐃᓚᒋᔭᖅ.
- ᐃᓄᐃᑦ ᐊᐅᓚᑦᓯᔨᐅᕕᖃᕐᕕᖓ ᐃᓗᕐᕈᓯᕐᒨᓕᖓᔪᓄᑦ, ᐃᓱᒪᒐᓱᒋᐊᓕᑦᑎᒍᑦ ᓇᖕᒥᓂᖃᕈᑎᓄ ᖃᐅᔨᒪᐅᓯᖓᓗ ᐃᓕᑕᕆᔭᐅᓗᑎᒃ.
- ᑐᓴᐅᒪᖃᑎᒌᒍᑎᖏᑦ ᐃᓄᒃᑎᑑᕐᓂᐊᑐᑦ, ᖃᓪᓗᓈᑎᑐᑦ ᐊᒻᒪᓗ ᒍᐃᒍᐃᑎᑐᑦ ᕈᓐᓇᓕᑐᐊᕈᑎᒃ.
- ᖃᐅᔨᓴᕐᑏᑦ ᐱᓇᓱᑦᑎᒪᕆᐅᓂᕐᒧᑦ ᑲᒪᒋᔭᕆᒋᐊᓕᖏᑦ ᐱᓇᓱᐊᕆᐊᓕᖏᓪᓗ ᐃᓕᑕᕆᔭᐅᓗᑎᒃ ᓲᓱᒋᔭᐅᓗᑎᓗ.
5. ᐱᓇᓱᐊᖃᑎᒌᒍᑎᒋᓗᒋᑦ ᑐᕌᒐᖃᖃᑎᒌᒍᑏᑦ
- ᓄᓇᓕᒻᒥ ᐱᓇᓱᐊᖃᑎᒌᑦᑐᑦ ᖃᐅᔨᓴᕐᑏᓗ ᐱᓇᓱᖃᑎᒌᓚᖓᔪᑦ ᑖᒃᑯᐊ ᖃᐅᔨᓴᕈᑏᑦ ᐱᓇᓱᑦᑕᐅᓂᖏᓐᓂᑦ, ᐃᓚᖃᕐᑎᓗᒋᑦ ᖃᐅᔨᓴᕈᑎᑦᓭᑦ ᐊᐱᕐᓲᑏᑦ, ᖃᐅᔨᓴᕈᓯᐅᓚᖓᔪᑦ, ᑐᑭᓯᒍᑎᑦᓭᑦ ᐳᑯᑦᑕᐅᒍᓯᒋᓚᖓᔭᖏᑦ ᑐᑭᓯᔭᐅᓂᕆᓚᖓᔭᖏᓪᓗ ᐋᕐᕿᓱᕐᑕᐅᓂᖏᓐᓂᒃ, ᐊᒻᒪᓗ ᓄᐃᑕᐅᔪᑦ ᖃᐅᔨᔭᐅᑎᑕᐅᓂᖏᓐᓂᒃ.
- ᖃᐅᔨᒪᐅᓰᒃ ᒪᕐᕈᐃᖑᓗᑎᒃ ᑕᐅᕐᓯᐅᑎᑲᑦᑕᓗᑎᒃ ᖃᐅᔨᓴᕐᑏᑦ ᓄᓇᓕᓪᓗ ᐱᓇᓱᐊᕐᑕᐅᓂᖏᓐᓂᑦ ᐱᓇᓱᒍᓯᖃᓚᖓᔪᑦ.
- ᐱᓇᓱᖃᑎᒌᑦᑐᑦ ᑐᓂᒪᖃᑎᒌᓪᓗᑎᒃ ᐃᓕᑕᕐᓯᓂᕐᒥᒃ ᓲᓱᒋᔭᖃᕐᓂᒥᓪᓗ ᐊᑐᓂᑦ ᐃᓪᓕᕆᔭᖏᓐᓂᒃ, ᖃᐅᔨᒪᐅᓯᖏᓐᓂᒃ ᐊᒻᒪᓗ ᖃᐅᔨᒪᔪᒻᒪᕆᐅᒍᑎᖏᓐᓂᒃ.
6. ᐱᕈᕐᓭᓗᓂ ᓄᓇᓕᒻᒥ ᐱᓇᓱᒍᓐᓇᓂᕐᒥᒃ
- ᐱᓇᓱᐊᕐᑕᖅ ᐃᑲᔪᕐᓯᓚᖓᔪᖅ ᐃᓄᐃᑦ ᐱᔪᓐᓇᓯᓂᖏᓐᓂᒃ ᐋᕐᕿᓱᐃᓂᕐᒥᒃ ᐃᓗᓯᓕᕆᓂᕐᒥ ᖃᓄᐃᖕᖏᓯᐊᕐᓂᒧᓪᓗ ᐱᓇᓱᐊᕐᑕᐅᖃᑦᑕᑐᑦᓴᓂᒃ.
- ᐱᓇᓱᐊᕐᑕᖅ ᐃᑲᔪᕐᓯᓚᖓᔪᖅ ᐃᓄᒃᑎᑐᑦ ᐅᖃᐅᓯᖃᖏᓐᓇᕈᓐᓇᓂᕐᒧᑦ, ᐃᓗᕐᕈᓯᕐᒧᑦ ᐊᒻᒪᓗ ᑭᓇᐅᓂᕐᒧᑦ ᖃᓄᕐᑑᕈᑎᐅᔪᓂᒃ, ᖃᐅᔨᒪᔭᐅᑎᑦᓯᓗᑎᓗ ᐃᓚᐅᔪᐃᑦ ᐱᔪᓐᓇᐅᑎᖏᓐᓂᒃ ᐱᓇᓱᐊᕈᒪᔭᖏᓐᓂᓗ.
- ᐱᓇᓱᐊᕐᑕᖅ ᐃᑲᔪᕐᓯᓚᖓᔪᖅ ᐱᒍᓐᓇᓯᒍᑎᖏᑦᑕ ᐱᕙᓪᓕᐊᔭᐅᓂᖏᓐᓂᒃ ᐱᓇᓱᒋᐅᕐᓴᕈᑎᖏᓐᓂᓗ ᐃᓄᓐᓂᒃ ᐃᓕᓐᓂᐊᕕᒻᒪᕆᓐᓂᑦ ᐃᓕᓐᓂᐊᕕᕐᔪᐊᓂᓪᓗ ᐃᓕᓐᓂᐊᑐᓂᒃ.
- ᐱᓇᓱᐊᕐᑕᖅ ᐱᒍᓐᓇᓯᒍᑎᑦᓴᓄᑦ ᐱᓇᓱᐊᕈᓐᓇᓯᒍᑎᑦᓭᑦ ᐱᕙᓪᓕᐊᑎᑕᐅᓂᖏᓐᓄᓗ ᓄᓇᓕᒻᒥ ᐃᓘᓐᓈᒍᑦ ᐱᕕᑦᓴᖃᕐᑎᓯᓚᖓᔪᖅ.
7. ᐃᓕᑕᕐᓯᓗᓂ ᐊᒡᓚᑐᓂᒃ ᐃᑲᔪᕐᓯᔪᓂᓪᓗ ᐃᓘᓐᓇᖏᓐᓂᒃ ᐱᓇᓱᑦᑕᐅᔪᓂᑦ
- ᐳᑯᑦᑕᐅᔪᓂᒃ ᑐᑭᓯᒍᑎᑦᓭᑦ ᐊᒻᒪᓗ ᓄᐃᑕᐅᔪᓂᒃ ᖃᐅᔨᔭᐅᑎᑦᓯᒍᑎᑦᓭᑦ ᐱᓇᓱᖃᑎᒌᒍᑎᐅᓚᖓᔪᑦ ᐃᓄᓐᓄᑦ ᐱᓇᓱᖃᑎᒌᖃᑎᐅᔪᓄᑦ, ᓄᓇᓕᒻᒧᑦ ᐊᒻᒪᓗ ᖃᐅᔨᓴᕐᑎᓄᑦ.
- ᓄᓇᓕᒃ ᑖᓐᓇ ᐱᔪᓐᓇᐅᑎᓕᒃ ᑲᒪᒋᔭᖃᕈᓐᓇᓂᕐᒥᒃ ᐊᐅᓚᑦᓯᒍᓐᓇᓂᕐᒥᓗ ᑭᒡᒐᑐᕐᑕᐅᒍᓯᕐᒥᓂᒃ ᐱᓇᓱᐊᕐᑕᑯᑦ ᓇᐅᑐᐃᓐᓇᓄᑦ ᑐᓴᕈᑎᐅᒍᓐᓇᑐᓅᕐᑕᐅᓂᐊᕐᑐᓂᒃ.
- ᐊᒡᓚᓯᒪᔪᓕᐅᕐᓂᖅ ᑐᓴᕐᑎᓯᒍᑎᓂᒃ ᐊᓯᖏᓐᓂᓗ ᐊᒡᓚᓯᒪᔪᖕᖑᑎᑕᐅᔪᓂᒃ ᐊᑐᕐᑕᐅᓂᐊᕐᑐᖅ ᑕᒪᖏᓐᓄᑦ ᖃᐅᔨᓴᕈᑎᓕᕆᔨᓄᑦ ᓄᓇᓕᒻᒥᓗ ᐱᓇᓱᖃᑎᐅᔪᓄᑦ.
- ᓄᓇᓕᒻᒥ ᐊᔪᖀᒋᐊᕐᓂᒧᑦ ᑲᑎᒪᔩᑦ, SQIA ᐊᒻᒪᓗ ᐊᓯᖏᑦ ᑎᒥᐅᔪᐃᑦ ᖃᓄᐃᓘᕐᑎᐅᒪᖔᑕ ᐃᓕᑕᕆᔭᐅᓂᐊᕐᑐᑦ ᑐᓴᕐᑎᓯᒍᑎᓂᑦ ᐊᒡᓚᓯᒪᔪᓕᐊᕆᔭᐅᔪᓂᓪᓗ.
- ᐃᒻᒥᒍᑦ ᐊᒡᓚᓯᒪᔪᒥᒃ ᐳᑯᑦᑕᐅᔪᓂᒃ ᓇᖕᒥᓂᖃᕐᓂᐅᑉ, ᐊᐅᓚᑦᓯᓂᐅᑉ, ᐊᑐᕈᓐᓇᓂᐅᑉ ᐊᒻᒪᓗ ᓇᖕᒥᓂᖃᕐᓂᐅᑉ ᖃᓄᐃᓕᖓᓂᖏᓐᓂᒃ ᑐᑭᓯᓇᕐᑎᓯᔪᒥᒃ ᐋᕐᕿᓱᕐᑕᐅᔪᖃᕐᓂᐊᑐᖅ ᐱᓇᓱᐊᖃᑎᒌᑦᑐᓄᑦ ᖃᐅᔨᓴᕐᓂᖅ ᐊᑑᑎᔭᐅᒋᐊᓚᐅᕐᑎᓇᒍ.